Main Menu

બાબરામાંથી પસાર થતાં હાઈ-વેની મરામત શરૂ કરાઈ

બાબરામાં રાજકોટ ભાવનગર અને બાબરા અમરેલી સ્‍ટેટ રોડ છેલ્લા 6 માસથી બિસ્‍માર હાલતમાં છે. અનેકવાર અમરેલીની માર્ગ અને મકાન વિભાગની કચેરીને સ્‍થાનિક લોકો દ્વારા રજુઆત કરવામાં આવી હતી. અગાઉ નવરાત્રી અને મહોરમના પર્વ ઉપર મામલતદાર ચિંતન વૈષ્‍ણવ દ્વારા નગરપાલીકાનાં સહકારથી માટી પાથરી પેચ વર્ક કરવામાં આવ્‍યુ હતુ જેથી થોડા દિવસો સુધી વાહન ચાલકોએ રાહત મેળવી હતી. આ રોડ ઉપર તાત્‍કાલિક અસરથી ડામરથી પેચ વર્ક કરવા મામલતદાર દ્વારા માર્ગ અને મકાન વિભાગ (સ્‍ટેટ) નાં કાર્યપાલક ઈજનેરને રજુઆત કરવામાં આવી હતી. ત્‍યારે મોડે મોડે પણ તંત્ર જાગ્‍યુ અને બાબરા શહેરના સ્‍ટેટ હાઈવે રોડની મરામત કામગીરી હાથ ધરી પણ થુકના સાંધા કરતા હોય તે રીતે કામગીરી હાથ ધરાતા વાહન ચાલકો તેમજ હાઈવે રોડ ઉપર દુકાન ધરાવતા વેપારીઓએ પણ રોષની લાગણી વ્‍યક્‍તત કરી હતી. અહી દુકાનધરાવતા વેપારી નિલેશભાઈ રંગપરીયાએ જણાવ્‍યુ હતુ કે, તંત્રને પાણી અને ડામરના ભેદની પણ ખબર પડતી નથી. માટે જ રોડ ઉપર પાણી ભરેલા ખાબોચીયા ઉપર ડામર પાથરી સમારકામ કરવામાં આવી રહ્યુ છે. આ કામ કલાકો પણ ટકી શકે તેમ નથી વળી મરામતની કામગીરીના સ્‍થળ ઉપર તંત્રની કોઈ અધિકારી કે સુપરવાઈઝર હાજર રહેતા નથી તો પછી શામાટે તંત્ર આવા નાટક કરી રહ્યુ છે. આ બારાની જાણ મામલતદાર ચિંતન વૈષ્‍ણવને થતા તેઓ દ્વારા માર્ગ અને મકાન વિભાગને રજુઆત કરી કામ અટકાવવા જણાવ્‍યુ હતુ. જો કે આ બાબતે માર્ગ અને મકાન વિભાગના એસ.ઓ. સોલંકીએ જણાવ્‍યુ હતુ કે, મજુર દ્વારા આ રીતની કામગીરી થતી હોય તેની જાણ થઈ છે. પણ ફરી વાર જે એજન્‍સીએ મરામતની કામગીરી હાથ ધરી છે. તેને સુચના આપી દેવામાં આવી છે. આમ, હાલ તો તંત્ર દ્વારા પાણી ઉપર ડામરની કામગીરી હાથ ધરી નબળી કામગીરીનું ઉત્તમ ઉદાહરણ પુરુ પાડ્‍યુ છે. ત્‍યારે સવાલ એ થાય છે કે તંત્ર દ્વારા જે તે એજન્‍સીને મરામતની કામગીરી સોપવામાં આવે છે. તો શું તેને પાણી અને ડામરના ભેદની ખરેખર સમજ નહી હોય ! કે પછી આમા પણ અધિકારીઓની સંડોવણી છે.

Source: Amreli Express